گۆڤارا بەصمە کو گۆڤارەکا گشتییە و ل دھۆکێ دەردکەڤیت دیدارەکا تایبەت ل گەل رێڤەبەرێ گشتی یێ وەبەرھێنانا دھۆک ئەنجام دایە و تێدا بەحسا پڕۆژەیێن راوەستیایی و دەرفەتن وەبەرھێنانێ کریە… ھەوڵ بۆ دانانا ماستەرپلانەکا پڕۆژێن ئاکنجیبوونێ ل سەر بنەمایێ رێژا ئاکنجیبوونێ ھەنە پێشەوا بەھلەوی کەرتێ وەبەرھێنانێ ل پارێزگەھا دھۆک د گەشەکرنێ دایە و دەرفەتێن نوی ل ھەمبەر وەبەرھێنەران د وارێن جودا دا و ب تایبەت د کەرتێ گەشتیاریێ دا دھێنە ڤەکرن,ھەروھا کێشێن پرۆژێن ئاکنجیبونوونێ ژی د قۆناغا جارەسەر کرنێ دانە و ل دویڤ یاسایێ سەرەدەری ل گەل سەرپێچکاران دھێتە کرن.
ددیدارەکا بەێمەدا رێڤەبەرێ گشتی یێ وەبەرھێنانا دھۆک، کوردۆ ئحسان دیار دکەت کو پشتی نەمانا قەیرانا دارایی ئێدی وان تەرکیز ئێخستیە سەر وان پڕۆژەیان کو ژبەر قەیرانێ کار تێدا راوەستیابوو تایبەت ژی دوارێ ئاکنجیبوونێ دا ژبەرکو ژ ئەنجاما راوەستیانا وان پڕۆژەیان وەڵاتی زەرەرمەندێ ھەرە مەزن و سەرەکی بوو لەوما “ھەر پڕۆژەیەکێ راوەستیایی مە یێ رادەستی وەبەرھێنەرەکێ نووی کری و ددڤێت ددەمەکێ دەستنیشانکری دا بھێتە بدوماھی ئینان و وەک قەرەبوو ژی دێ داشکاندنەک د پارێ وەڵاتیان یێ مایی دا ھێتەکرن”.
کوردۆ ئحسان گۆت ژی ئەو ھەوڵ دەن “ماستەرپلانەک ل سەر پیڤەرێ رێژا ئاکنجیبوونێ بھێتە دانان دا کو پڕۆژەیێن ئاکنجیبوونێ ل دویڤ پێتڤیێ ل ھەر جھەکی بھێنە دانان”.
دەربارێ گرنگی پیدانا وەبەرھێنانا بیانی دکەرتێن جودا دا، کوردۆ ئحسان ئاماژە ب سروشتێ دھۆک کر و گۆت دھۆک ب سروشتێ خۆ یا زەنگینە ب تایبەتی ژلایێ چاندنی و گەشتوگۆزارێڤە، ھەروەسا ل ڤان سالێن دوماھیێ کەرتێ پیشەسازیێ ژی پێش دکەڤیت، ھەوڵەک ھەیە کو دەڤەرێن نووی یێن پیشەسازی بھێنە دانان، لەوما حکومەت گرنگیێ ب ھەردوو لایێن وەبەرھێنانا بیانی و ناڤخۆیی ددەت، بۆ ڤێ چەندێ ژی دیاسایا وەبەرھێنانێ ژی دا دا دشیاندایە ئەرد ببیتە مولکێ وەبەرھێنەری، بەرھەمێ خۆ ببەتە ژ دەرڤەی ھەرێمێ، باج و گومرگ ل سەر کەرەستێن دەستپێکی نینە، ئەڤە ژی بۆ راکێشانا وەبەرھێنەرێن بیانی.
دەربارێ پڕۆژەیێن نووی ژی رێڤەبەرێ گشتی یێ وەبەرھێنانا دھۆک گۆت: دا کو چیایێ زاوا ببیتە جھەکێ گەشتیاری دەلیڤەیەکا گرنگە ل بەر وەبەرھێنەرا ھەروھا پارکا مەزن یا دھۆک و گۆت ژی دبیت دئایندەکێ نێزیک دا پڕۆژێ ترێنێ ژلایێ وەبەرھێنەرانڤە بھێتە بجھئینان دەربارێ ڤەگوھاستنا پێشەسازیا دھۆک ژی کوردۆ ئحسان گۆت:”جھێ وێ نەیێ گونجایی بوو و دی بۆ جھەکێ گونجایتر ھێتە ڤەگوھاستن و ل دویڤ ماستەپلانێ جھێ نووی دەڤەرا ئالۆکا ھاتیە دەستنیشانکرن، ژبەرکو جھەکێ ستراتیژی و گرنگە چونکی دھۆک و سێمێل و فایدێ و دۆمیز ب ئێکڤە گرێددەت، جھێ کەڤن ژی دێ بیتە پارکەکا گشتی.
