کۆڕبەندێ ئابووری یێ هەڤبەش دناڤبەرا هەرێما کوردستانێ و وەلاتێ ئوردن دەستپێ کر
کۆڕبەندێ هەڤبەش کو ل پایتەختێ وەڵاتێ ئوردنێ باژێڕێ عەممان بڕێڤە دچیت، دئێکەم رۆژا کۆڕبەندی دا کو وەزیرێ وەبەرهینانا وەڵاتێ ئوردن خەیری عومەر و سەرۆکێ دیوانا جڤاتا وەزیرێن حکومەتا هەرێما کوردستانێ د. ئومێد سەباح و سەرۆکێ دەستەیا وەبەرهێنانێ د. محەمەد شوکری و هژمارەکا بەرچاڤ ژ خودانکار و وەبەرهێنەرێن هەرێما کوردستانێ و وەڵاتێ ئوردن تێدا ئامادەبووینە سەرەڕای پێشکێشکرنا چەندین گۆتاران ژلایێ بەشداربوویانڤە، دهەمان دەمدا سەرۆکێ دەستەیا وەبەرهێنانا هەرێما کوردستانێ د. محەمەد شوکری ژی گۆتارەک پێشکشێکر و تێدا بەحسا ستراتیژ و دنیادیتنا سەرۆکوەزێرێ هەرێما کوردستانێ رێزدار مەسروور بارزانی و حکومەتا هەرێما کوردستانێ و دەستەیا وەبەرهێنانێ دەربارەی هاندانا وەبەرهێنەر و خودانکارێن بیانی ب مەرەما هاندانا وان بۆ پتر وەبەرهینانی دناڤ هەرێما کوردستانێ دا روونکر.
دبەشەکێ دیترێ گۆتارا خودا سەرۆکێ دەستەیا وەبەرهێنانێ ئاماژە دا وان یاسا و بەڕگە و مادەیێن کو دەستەیا وەبەرهێنانێ تێدا ئاسانکاریان بۆ وەبەرهێنەر و کۆمپانیێن بیانی دکەت دا کو وەبەرهێنانێ ل هەرێما کوردستانێ بکەن.
د. محەمەد شوکری تەکەزی ل سەر وان کار و پڕۆژەیان ژی کر کو بۆ ژێرخانا هەرێما کوردستانێ دگرنگن بتایبەتی سێکتەرێن پیشەسازی و چاندنیێ و گەشتیاریێ، و داخاز ژ وەبەرهێنەرێن ئوردنی کر کو رۆلێ خۆ دوان سێکتەران دا ببین و کار و پڕۆژەیان ل هەرێما کوردستانێ ئەنجام بدەن.
دبەشەکی دی یێ کۆڕبەندێ دا شاندا هەرێما کوردستانێ بڕێکا پێشکشێکرنا پرێزنتێشنەکێ سێکتەرێن وەبەرهێنانێ دهەموو واران دا روونکرن و پاشی ب رێکا داتاشیۆی پێشکەفتنێن هەرێما کوردستانێ دانە دیارکرن و بوونە جهێ سەرنجا وەبەرهێنەر و بەرپرسێن ئوردنی.
پاشان یاداشتەکا لێکتێگەهشتنێ بۆ دانانا جڤاتەکێ بۆ کاری هەڤبەش دناڤبەرا ئێکەتیا وەبەرهێنەرێن کوردستانێ و ئوردن دا ئیمزاکرن.