لژنا گەشەپێدان و پشتگریکرنا پرۆژێن پیشەسازی و وەبەرهێنانێ ب سەرپەرشتیا پارێزگارێ دهۆکێ کۆمبوو

لژنا پیشەسازی و وەبەرهێنانێ: رەزامەندی و ئەرد بۆ ٩ کارگەهان تەرخانکر و دەلیڤێن کاری بۆ پتر ژ ٥٠٠ کەسان دێ هێنە دابینکرن

ئەڤرۆ رۆژا دووشەمبی رێکەفتی ١٩ی خزیرانا ٢٠٢٣ێ ب سەرپەرشتیا بەرێز “د.عەلی تەتەر” پارێزگارێ دهۆکێ لژنا گەشەپێدان و پشتگریکرنا پیشەسازی و وەبەرهێنانێ ب بەرهەڤبوونا رێڤەبەریێن پەیوەندیدار و سەرۆکێ ژۆرا بازرگانی و پیشەسازی و سەرۆکێ ئێکەتیا وەبەرهێنانێ ل پارێزگەها دهۆکێ کۆمبوون.

دکۆمبوونێدا دانوستاندن ل دۆر پرۆژێن هاتینە پێشنیارکرن هاتەکرن و رەزامەندی دگەل تەرخانکرنا ئەردی بۆ ٩ کارگەهێن پیشەسازی و وەبەرهێنانێ دبیاڤێن (بوریێن چاندنێ، بەرهەمئینانا هەمی جۆرێن خارنێ، بەرهەمئینانا کەلوپەلێن پیشەسازی، بەرهەمئینانا نایلۆنی، کەرەستێن پاقژکرنێ، بەرهەمئینانا کارتۆنی، بەرهەمئینانا پلاستیکی، کارگەها بەرهەمئینانا گێچی، کارگەها بەرهەمئینانا حەفازا و هەمی جۆرێن کلینیسان).

ب دانا رەزامەندیێ و تەرخانکرنا ئەردی دەلیڤێن کاری دێ بۆ پتر ژ (٥٠٠) کەسان هێنە دابینکرن. هەروەسا لژنا گەشەپێدانا پیشەسازی و وەبەرهێنانێ بریاردا پێداچوون دئەرد و رەزامەندیێن وان کارگەهاندا بهێتەکرن یێن بەری نۆکە دەستیری هەی و دەستبکارنەبووی.